Ghimentë
- Oures qe les Cllôz Librs sont ouverts
- Du mardi ao venderdi de medi a 7o ao sair / semedi e dimaine de 2o la véprée a 7o ao sair
- Petites vacancées d’ecole
- du mardi ao venderdi de 10o ao matin a 7o ao sair / semedi e dimaine de 2o la véprée a 7o ao sair
- Oures de la Lérerie és biaos jous (mouéz de juïllet e d’oût)
- Du mardi ao venderdi, de 1o la véprée a 9o ao sair / Semedi (toute la Lérerie) e dimaine (Ren qe l’Aire és qeniaos, le chapitrè e Vie du Citeyen) de 2o la véprée a 7o ao sair
- Croulhèt
- La bâre ét minze les lundis e fétes gardées
Ao qheur de la metropole de Rene a deûz encalées de la gâre, Les Cllôz Librs, ouverts du mardi ao dimaine sont tout a la fai un muzë, eune lérerie, eune siancerie, des sales de montrerie su l’istouere de la Bertègn, la fotografie du patrimouene e d’astoure, les siances e lous rencontr o les arts... Pour ce qi n-n'ét de l’ôfr qhulturale, ole ét ben gâre, debârée e pour de ren den sa plleuralitë.
Compagnie
La Lérerie
La Lérerie perpôze des services a votr amain (ordrinouérs o internet, wifi, aotanouérs) e 240 000 doqhuments qe le monde peuvent vaer a lous long laizi e qi sont reglèment chanjës. Ole a des massacrs de defilandées ancienes de bonvalence, su la Bertègn parème. Ses valants, plleuralists e gâres, sont aotant d’afutiaos de qhulture, de savairs, de laizis pour tertout. La Lérerie perpôze des aires qi retirent pouint yeune den l’aotr. Tertoute e tertout peuvent i terouer un endret eyou se defuter, se delâsser, jeouer, tarvâiller, s’entr-caozer, aprendr, tout sou ou ben o le monde. Vous pouéz i rentrer e v’aherder pour de ren. O l’aherderie vous pouéz emprinter den toutes les Léreries de Rene e v’éz etout, a votr bada e pour de ren, des fimes, des journaos, de la muziqe e des formézon su un emplla a son apart.
Le Muzë de Bertègn
Le Muzë de Bertègn ét vouë a la societë bertone e a tout le cai q’a chanjë den la societë-la. Sa montrerie de bonvalence, Eune istouere de la Bertègn, qe le monde peuvent aler vaer a lous long laizi, e tous les rend’ous perpôzës, sont ben la prouve de la richesse de l’istouere de la Bertègn e de la vie des siens du payiz. Le muzë done a vaer un patrimouene populére come i n-n’a pouint âillou, o des bezaignes e des racontées. Dede d’o tout le cai qi s’orine de la rasserrerie e des donées, le muzë prie le monde a amener son brocheton a la fromiere pour oriner e erdoner eune memouere vioche e tenant rennouviaozie. Vous qi venéz vaer du Muzë de Bertègn, v’aléz pouair, o des aodio-ghides, decouvri en galo e pour de ren l’istouere de la Bertègn e des siens qi yi demeurent.
O la siancerie
O la siancerie le monde ont des roches pour se forjer eune qhulture siançouze de bonvalence. O un Planetariom, le laboratouere a Merlin e puzieurs sales de montreries, la Siancerie perpôze long l’année des précheries e des alivetées pour toutes les menieres de monde. La montrerie de bonvalance Incroyable Cerveau (un Cervè Maitië Pâs Crayabl), s’orine su les savancetës les pus nouvelles den les neurosiances. O la montrerie-la, v’aléz pouair decouvri tous les segrets du cervè oumain. L’emplla de la Siancerie e sa chaïgne YouTube sont des vrais purs de savancetées.
En pus des montreries qu’ont a-revaer o la qhulture e le patrimouene, les Cllôz Librs pergrament etout long l’anée de montreries de fotos qi perzentent l’ouvraije d’artists d’astoure ou ben des fotos orinées du patrimouene fotografiqe q’ét a nijot ao muzë de Bertègn. La sale de montrerie Anita Conti ét vouée és arts limeriqes e és projits qi mélayent les arts e les siances. Les rend’ous a l’aoditoriome, a la Lérerie e ao Cafë sont aotant d’arivâs pour encontrer toutes les sienes et les siens q’en ouaye conter de yeûs a la banie, qe ça seje pour les ecrivaijes, les siances ou ben core les arts. Den l’aire Vie du citayen a l’embâs, n-i a des ordrinouérs, des gazettes, des jeûs de tabl pour les siens qi vieulent. Den l’aire-la le monde peuvent fére lous recllameries fezandieres etout.